Modi-a'n US a tlawh hunah nawrh huaihawt tum

US human rights group - Indian American Muslim Council, Peace Action leh Veterans for Peace and Bethesda African Cemetery intel khawmte chuan June 22-a Prime Minister Narendra Modi-a'n US a tlawh hunah White House bula nawrh huaihawt an tum tih an sawi.

Human rights group-te hian India rama mihring dikna leh chanvo dinhmun tla hniam mek zel an duh lohna lantirin nawrh hi huaihawt an tum a ni.

US hian khawvela democracy ram lian ber, India nena an inzawmna tihngheh zel hi China beng hniamna atana thil ṭul niin an ngai a, hetih lai hian US right group-te chuan he thil hian human rights chungchang a hliahkhuh an hlauhthawng a ni. US sorkar ngeiin mihring dikna chanvo rahbehna hi hnam leh sakhaw tlem zawkte, sorkar sawiseltute leh journalist-te chunga sorkar chet danah a innghah thu a sawi mek laiin, India chet dan hi a thlir liam mai mai an hlauhthawn thu an sawi.

Modi an hmuahnaah human rights group-te hian 'Modi not welcome' tih leh 'Save India from Hindu Supremacy' tih flyer-te lo siam an tum bawk.

New York-ah pawh Modi-a duh lohna lantir nan hian kum 2019-a Texas-a PM Modi leh hetih laia US President, Donald Trump te'n rally an neih, 'Howdy Modi' tih behchhan leh tihelna atan 'Howdy Democracy' tih hun buatsaih an tum bawk.

Amnesty International leh Human Rights Watch-te chuan, kum 2002-a Gujarat intualvuakna thlenga hetih laia Gujarat Chief Minister, Narendra Modi a inhnamhnawih theih dan BBC-in documentary an siam chu Washington-ah tihchhuah an tum a, he huna tel tur hian dan siamtu, journalists leh mi thiam bikte sawmin zir chianna an nei dawn a ni.

Modi-a'n sorkarna a siam hnuin India hi press miten zalenna an neih dan tehnaah a tlahniam zel a. World Press Freedom Index-ah 140-na ni ṭhin chu 161-naah a tla thla tawh a, India dinhmun hniam ber ṭum a ni nghe nghe. Kum nga chhung chu India hi khawvela internet shutdown zin berna ram a ni tawh bawk.