J&K-a security force-te'n hel 5 an kap hlum

Indian Army leh Jammu and Kashmir police ṭangkawpin joint operation an neihah, nimin zing khan Line of Control (LoC) bul, Kashmir district-a Kupwara hmunah hel pawl nen inkapin hel panga an kap hlum.

Security force-te hian Jumagund area-ah hel inkhuar an awm nia thu an dawn bawhzuiin, Ningani zan aṭang khan beihpui hi an thlak a ni. Nimin zing khan helte nen hian an inkap zui ta a ni. Kashmir ADGP, Vijay Kumar chuan an inbeihnah hian ram dang mi hel panga kah hlum an ni a, hmun dang pawh an dap chhunzawm mek tih a sawi.

Kupwara-a LoC bulah June 13 khan hel pahnih kah hlum an lo ni tawh bawk tih Kashmir zone police-te chuan an lo sawi tawh bawk. He inbeihna hi Dobanar Machhal hmuna thleng niin an sawi.

June 2 khan J&K- a Rajouri district-ah rinhlelh thil avanga security force te'n Dassal Gujran ramhnuai an dapnaah hel pawl nena inkap bawkin, hel pakhat an lo kaphlum tawh bawk.