Nehru Memorial Museum and Library Society hming thlak; Nehru hming paih a nih avangin Congress party lungawi lo

India-in zalenna a sualna leh neih dante hriatrengna atana an vohbik hmun, Prime Minister hmasa ber Jawaharlal Nehru chenna ṭhin, Teen Murti House an tih bawk, Nehru Memorial Museum and Library tih chu BJP kaihhruai sorkar laipui chuan 'Pradhanmantri Sangrahalaya' tiin a hming a thlak.

Ministry of Culture chuan Ningania The Nehru Memorial Museum and Library Society special meeting chuan institution hming thlak hi a rel tih a sawi. Special meeting hi Society vice-president, Defence Minister ni bawk Rajnath Singh chuan a kaihruai a ni.

Teen Murti House hi India zalen hnua Prime Minister hmasa ber, Jawaharlal Nehru official residence niin, kum 16 chhung zet chu he hmunah hian a lo khawsa a ni. He hmun nen hian inzawmna nghet tak a nei a ni. Kum 60 dawn liam taah khan he hmun hi Nehru-a hriatreng nan hetih laia President, S Radhakrihnan chuan a hming chawi hian a phuah a ni.

BJP sorkarin Nehru hriatrengna hmun hming thlak a, Nehru hming a paih hian mi tam tak a ṭhawng a, a bikin Congress party lam an lawm lo, inhnialna pawh a chawk chhuak nasa hle. Congress President, Mallikarjun Kharge chuan BJP chu anmahniin an thiltih leh sulhnu sawi tur an neih loh avanga midang thiltih nawhrehsak tumah a puh. Hei hi BJP national President, JP Nadda chuan chhang letin, Congress chu politics-a pawm theih loh nei natna vei an nih thu leh, India ram dinna atana an hriat chin chauh hruaitu an awm bik loh thu pawm ngam turin a ti ve thung.

Kharge chuan a Twitter-ah,"BJP-RSS -te rilru tetzia leh mi pakhat lalna hmanga kaihhruai an nihzia a lantir a ni. Heng an thiltih ho te te hian India-in tun dinhmun thlenna tura Nehru-a thiltihte a hliah zo chuang lo ang," a ti.

Congress General Secretary (Communication), Jairam Ramesh pawhin Prime Minister Narendra Modi bei zuiin, "Zahpuiawm leh phuba lak chaknaa khat chu Modi-a hi a ni. Nehru Memorial Museum and Library hi kum 59 chhung chu khawvel huapa hmun pawimawh leh hlu, thil hlui leh lehkhabu hlu tak tak dahna nia hriat a ni. Tunah chuan Prime Ministers Museum and Society tih ringawta hriat a ni tawh ang. Modi-a hian India nihna siamtute hming leh sulhnu thaichhia a, tihmelhem tur hian eng nge tih loh a neih tawh le? Ama tlin lohna avanga midang thiltih lan tettir tum, mahni duh thua Vishwaguru inti a ni," tin a Twitter-ah na takin a ang ve bawk.