PM Modi-a'n Maan Ki Baat vawi 102-na hmang

19th June, 2023

Prime Minister Narendra Modi chuan thla tina radio programme a neih ṭhin, Maan Ki Baat vawi 102-na chu nimin khan a hmang.

Maan Ki baat hi thla tina Pathianni hnuhnung berah hman ṭhin a ni. Mahse PM Modi hi kar lehah hian US-ah a zin dawn avangin tun ṭumah hian kar khatin an sawn hma a ni. PM hian,"Ka zin dawn avang leh ka zinnaa ka buai dawn avangin, ka zin chhuah hmaa Maan Ki Baat hun sawn hma mai hi a remchangin, a ṭha zawkin ka hria a ni," a ti.

Prime Minister hian thil chi hrang hrang sawiin, ni hnih thum liam ta maia Gujarat-in cyclone Biparjoy an tawrh chungchangah, thuneitute hmalakna leh kawng hrang hranga hnathawktute chu chhuanawm a tih thu a sawi."Kutch mipuite huaisenna leh an inbuatsaihna a ṭha tak zet a, beisei leh la hriat ngai loh theihna an neih hmangin Kutch mipuite hi he chhiatna aṭang hian an tho chhuak leh ang," tiin Kutch mite chu a fak bawk.

Modi chuan,"India hi democracy hringtunu a ni a, kan ram democracy pawh hi kan ngaihlu hle a ni. Kum 1975, June 25-a emergency puan a nih khan kan tuar nasa hle a, kan theihnghilh ngai lo ang," tia sawiin, India ram national emergency puan a nih ṭum kha India ram hun thim lai ber a nih thu a sawi bawk.

PM chuan kum 2025-ah chuan Tuberculosis (TB) kan tireh tawh ang tih sawiin,"Ni-kshay Mitra chu India rama Tuberculosis tireh tura beihpui thlak tura hmala tu a ni. Thingtlang hmun tam takah chuan mite'n TB veite an buaipui a, hei hi India theihna lanna dik tak a ni," tiin a sawi.

UP-a Hadpur mipuite'n lui an chhanchhuah chungchang chu sawiin an fakawm a tih thu a sawi bawk. Hadpur district-ah hian lui kang chat tawh chu mipuite hmalakna avangin tuihna a lo awm thar leh a,he lui hnar hi Amrit Sarovar siamna atana hman tum a ni.

PM Modi chuan Japan rama an tihdan pakhat, Miyawaki chu hmun ṭhenkhata lei ṭhat tawk lohnaah lei tihṭthatna atana hman tlak a nih thu a sawi bawk.

April 26 khan Maan Ki Baat vawi 100-na hi hman a ni a, ram puma live-a pekchhuah a nih bakah, New York-a United Nations headquarters-ah pawh live-in pek chhuah a ni.