President rule hnuaiah J&K kum 5 a awm tawh

India ramin zalenna a hmuh hnua a rei ber dawttu ni turin, Jammu and Kashmir chu sorkar laipui rorelsakna hnuaiah kum nga a awm tling ta.

Sorkar laipuiin state rorelna a chhuhsakna (President rule, national emergency leh financial emergency) hi India rama state hrang hrangah ṭum 125 a thleng tawh. J&K bikah hian tun ṭuma President rule puan a nih hi kum 1977 aṭanga chiarin a ṭum riatna a ni. J&K-ah hian kum 1990-1996 chhunga President rule puan kha President rule puan rei berna a lo ni tawh bawk.

J&K Chief Minister hlui, Mehbooba Mufti kaihhruai, People's Democratic Party (PDP) leh BJP-te chuan ṭangrual sorkar an din a, BJP chu an thawhdunna aṭanga an inhnuhdawh avangin June 19, 2018 khan ṭangrual sorkar chu a tawp a, Governor rule-ah an awm zui a ni.

Kum 2019, August thla khan sorkar laipui chuan India danpui hnuaia Article 370 hmanga J&K tana special status a pek, mahnia ro inrelna thui tak a neih chu a titawp a, hemi hnu hian state an nihna pawh hlihsakin J&K state chu Union Territory pahnihah a ṭhen zui bawk. Union Territory tharah hian assembly inthlan buatsaih a la ni lo.

J&K Chief Minister hlui Omar Abdullah chuan BJP chu chak loh hlauh avanga tun thlenga inthlan huaihawt ngam loah a lo puh tawh a, People's Conference hruaitu Sajad Lone leh hruaitu dangte pawhin J&K state nihna hlihsak a ni chu democracy hnawlna a ni, tiin an sawi.

Eptute puhna hi J&K-a BJP hruaitu, Ravinder Raina chuan rally an neihnaah chhang letin, J&K-a election hhuaihawt vat tura Election Commission a ngen thu a sawi ve bawk.