Gita Press hnenah Gandhi Peace Prize 2021 hlan a ni dawn

Ministry of Culture chuan tharum tel lo leh Gandhian method hmanga khawtlang, ram inrelbawlna leh politics-a danglamna siam kawnga an thawh hlawk avangin Gorakhpur-a Gita Press chu Gandhi Peace Prize 2021 hlan an ni dawn tih Pathianni khan an puang.

Kum 1995-a sorkarin a siam, kum tina sem ṭhin Gandhi Peace Prize award hi Gandhi-a thuthlung leh nunphung chawi nuna hriatrengna atana buatsaih a ni. Lawmman hian pawisa fai, cheng vaibelchhe khat bakah citation, plaque leh kut themthiam thil siam a keng tel. He chawimawina lo dawng tawh zingah hian ISRO leh Ramakrishna Mission-te pawh an tel.

Prime Minister Narendra Modi chuan,"Gandhi Peace Prize 2021 dawng tur Gita Press te ka lawmpui e. Kum 100 ral ta chhung khan anni hian khawtlang leh hnam ṭhanna atan an thawh hlawk hle a ni," tiin Twitter-ah a lawmpuina thu a tarlang.

Kum 1923-a din Gita Press hi khawvela lehkhabu publish-tu lian berte zinga mi an ni a, ṭawng hrang chi 16 hmangin lehkhabu nuai 417 an lo chhuahsak tawh a, chung zingah chuan Shrimad Bhagad nuai 162 a tel bawk a ni.

Congress chuan Gita Press hnena chawimawina hlan tur hi he chawimawinain a tum persan lutuk thil nia ngaiin an duh lo hle thung. Congress General Secretary (communications) Jairam Ramesh chuan,"Gita Press chanchin hi Akshaya Mukul chuan kum 2015 khan a ziak a, hetah hian Gandhi-a'n sakhua, politics leh khawtlang rawng a bawl dana ngaihdan inang lo tak an neih leh an inmil lohna tam tak a tarlang. Heti chunga chawimawina pek an ni tur hi Savarkar leh Godse chawimawi ang vel a ni," tiin a Tweet ve bawk.