Tamil Nadu-a rorel lai DMK thupuangtu man a ni

Tamil Nadu-a rorellai party, Dravida Munnetra Kazhagam (DMK) thupuangtu Sivaji Krishnamurthy chu Tamil Nadu Governor, RN Ravi leh BJP hruaitu, Khushbu Sundar-te chungchang mawi lo leh zah lo taka a sawi avangin man a ni.

DMK General Secretary, Duraimurugan chuan Pathianni khan Sivaji Krishnamurthu hi an party aṭanga ban a nih thu a sawi bawk. "Sivaji Krishnamurthy hian party inkaihhruaina a bawhchhiat avang leh party hming hliauna a thlen avangin party-a a nihna zawng zawng bakah, party mi a nihna pawh hlihsak a ni," a ti.

Tamil Nadu police-te chuan DMK hruaitu hi IPC section 153, 294(b), 504, 505(1)(b) leh 505(2) hnuaiah thubuai an siamsak nghal a ni.

Krishnamurthy hian Tamil Nadu Governor chu DMK hruaitu Santhil Balaji hna Minister dang hnena a pek duh loh avanga mawl a tih thu sawiin, BJP hruaitu Sundar pawh tar chhia tiin a sawi a. Tamil Nadu Fisheries Minister hlui Jayakumar pawh sawi telin, Balaji man chungchangah tawngkam ṭha lo tak tak a hmang bawk.

Krishnamurthy hi kumin kumtir khan Governor chungchanga ṭawngkam mawi lo tak a hman avangin opposition party-te chuan ban turin an lo nawr tawh a, party atanga thla nga suspend a nih hnuah ngaihdam a dil avangin an hremna hi an titawp leh a ni.