US tlawh turin PM Modi a zin chhuak

Prime Minister Narendra Modi chu ni thum cham turin nimin khan US-ah a zin.

PM Modi hi US-a a cham chhung hian US Congress joint session-a thu a sawi dawn bakah, sumdawng liante leh India sorkar tirh hnathawka awmte a kawm bawk ang. US President, Joe Biden chuan White House-ah a pualin zanriah a lo buatsaihsak dawn a ni.

Ningania US Congress-a thu a sawi tur hi PM Modi-a'n thu a sawi ṭum hnihna tur a ni.

Foreign minister S Jaishankar chuan, "India Prime Minister zingah vawi hnih thu sawi an la awm ngai lo. Khawvela ram hruaitu dangte zingah pawh Winston Churchill, Nelson Mandela leh mi tlemte chauh US Congress-a thu vawi hnih sawi tawh hi an awm a, chuvangin tuna PM Modi-a thu sawi tur hi a namai lo hle a ni," a ti.

PM Modi-a hi France President Emmanuel Macron leh South Korea President Yoon Suk Yeol te hnua President Biden-a'n ram dang hruaitu an ram tlawh zinga state dinner a buatsaihsak leh hmasa ber a ni dawn bawk.

Kum 2014-a Modi-a'n sorkarna a siam hnuah US-ah hian ṭum ruk zin tawhin, Barack Obama, Donald Trump leh Joe Biden te hi a lo kawm tawh ṭhin a, tun tumah erawh ram khat hotu lu berin zin tura a sawmna anga a zin 'state visit' a neih ṭum khatna tur a nih avangin a dan a dang deuh a ni. Modi hi President Biden leh a nupui Jill Biden-te'n US tlawh tura an sawmna dawnga zin a ni. June 22 hian state dinner an buatsaihsak ang.

Modi hian vawiinah UN building-a World Yoga Day hun hmanna chu a kaihruai dawn a ni. India sorkar hnathawk, US hmun hrang hranga awmte kal khawm hmaah Zirtawpni khian, Washington-a Ronald Reagan building leh International Trade Centre-ah thu a sawi bawk ang. Indian-American tam tak chu Modi-a lo hmuah nan hmun eng emaw zatah an pung khawm a ni.

PM hi US aṭang hian Egypt-ah kal leh phawtin, chumi hnuah India a rawn let chauh ang.