HAM(S) party-in Nitish Kumar an thawhpuina titawp

Hindustan Awam Morcha (Secular) chuan Bihar Chief Minister Nitish Kumar kaihhruai sorkar an thlawpna an titawp.

HAM (S) hian Chief Minister hlui, Jitan Ram Manjhi ina national executive committee meeting an neih hnuin, Thawhṭanni khan Nitish Kumar-a sorkar an thawhpuina an tihtawp thu an puang a, governor Rajendra Vishwanath Arlekar hnenah ṭangrual sorkar aṭanga an inhnuhdawhna lehkha an pe nghal a ni.

Bihar-a Nitish Kumar kaihhruai ṭangrual sorkarah hian Janata Dal (United), Congress bakah Rashtriya janata Dal (RJD), Left parties leh independent-te thawkhoin, Bihar assembly seat 243 awm atangin seat 160 an nei pha a ni. HAM(S) hian seat pali neiin, Bihar Legislative Council-ah seat khat an nei bawk. Sorkarna siam tura seat neih ngai zat hi 122 a ni a, HAM(S) hi inhnukdawk mah se, sorkar siamna a tibuai pha lo a ni.

Kar hmasa khan Manjhi-a fapa, HAM(S) national President Santosh Suman chuan an party hi JD(U)-a inchhunglut turin Nitish Kumar hian a nawr nia sawiin, cabinet minister a nihna aṭangin a lo bang tawh a ni.