Canada-ah Khalistan hel pawl hruaitu kah hlum a ni

India rama hel hruaitu ngaihven hlawh leh man tuma zawn nasat ber pawl, a lu man cheng nuai 10 nei lai, Khalistan Tiger Force (KTF) hruaitu Hardeep Singh Nijjar chu India huna Thawhṭanni zing dar 6 khan Canada-a Gurdwara pawnah kah hlum a ni tih official-te chuan an sawi.

Kum 45 mi Nijjar hi Canada ram huna Pathianni zan dar 8:30 khan British Columbia-a Surrey-a Guru Nanak Sikh Gurdwara hmunah, mi tu tih hriat loh pahnihin an kap hlum a ni.

He Gurdwara hi Nijjar hian kum li chhung a lo enkawl tawh a, he hmuna sum an dawn ṭhinte chu Punjab-a hel pawl tana pek ṭhin nia rinhlelhna pawh a lo awm fo tawh a ni.

India sorkar chuan July 2020 khan Unlawful Activities (Prevention) Act hnuaiah Nijjar hi firfiakah a lo puang tawh a, National Investigation Agency (NIA) chuan September 2020 khan India rama a thil neihte a lo hrensak tawh bawk.

Kum 2016 khan Nijjar-a lakah hian Interpol Red Corner Notice tihchhuah a ni a, Surrey-a police-te pawhin helna nena inhnamhnawih rinhlelh thilah kum 2018 khan house arrest-in an lo dah reng tawh bawk a ni.

He inthahna hi India ram pawna hel pawl hruaitu thahna hriat thar ber a ni. May thla khan Pakistan-a Punjab province, Lahore-ah Khalistan hel pawl mi, Paramjit Singh Panjwar chu a zing chhuak mi tu tih hriat lohin a lo kap hlum tawh bawk.