Health Minister-in khaw lum lutuk chungchang sawipui

Union Health Minister, Mansukh Mandaviya chuan nimin khan ram chhunga khaw lum nasa thleng mek chungchangah high-level meeting a ko a, mithiamte chu khaw lum zual zel hmachhawn tura state hrang hrangte inbuatsaihna neih dan a sawipui.

Tunhnaiah hian Uttar Pradesh, Bihar leh Odisha-ah chuan khaw lum avanga harsatna nei report a pung nasa hle. Khawchin thlirtute chuan India ram hmun thenkhat, a bikin heng- Uttar Pradesh, Bihar, Tamil Nadu, Madhya Pradesh, Jharkhand, Vidarbha, Odisha, West Bengal leh Andhra Pradesh ah hian khaw lum hian zual lam a la pan zel dawn niin an sawi. Khaw lum lutuk avang hian state ṭhenkhat chuan nipui chawlh hun an pawtsei hial a ni. Khaw lum vanga taksa lama harsatna tawk, damdawi-in dah luh pawh an pung chho hle a ni.

Indian Meteorological Department (IMD) chuan April-June chhung hian India ram hmun tam zawk chuan kum danga khaw lum ṭhin dan pangngai aia nasaa khaw lum an tuar tur thu a lo sawi tawh. IMD scientist, Naresh Kumar pawhin,"Khaw lum hi Bihar, Jharkhand, Odisha leh West Bengal-ah te a nasa zual. Hei vang hian IMD chuan orange alert kan chhuah tawh a ni. Andhra Pradesh leh Telangana tuipui kamte pawh khaw lum hian a tuam chho ṭan mek a ni," a ti.