President Murmu hoin International Yoga day hman a ni

International Yoga Day vawi 9-na chu President Murmu hoin nimin khan Rashtrapati Bhavan-ah hman a ni a, President hian Yoga posture hrang hrangte tiin hun a hmang a ni.

Ram chhung hmun hrang hranga BJP hruaitu leh minister-te pawhin International Yoga Day hi an hmang a, ni thum cham tura US-a zin, Prime Miniter Modi pawhin United Nations headquarters-ah UN hruaitu dangte nen yoga day hi an hmang.

Video-a thuchah a tihchhuahah, PM Modi chuan, "Yoga hian mihring min tichak thar a, chhung lam min hmuh fiahtir a, kan chhia leh ṭha hriatna nen min thlun zawmin, mihring anga kan inhmangaihna tipungin, kan nun hmangaih thiamna kawngah min pui ṭhin," tiin a sawi.

Vice President Jagdeep Dhankar chuan Yoga Day hi Jabalpur-ah a hmang a, Defence Minister Rajnath Singh chuan Kochi-a India kut chhuak aircraft carrier, INS Vikrant-ah a hmang bawk. Health Minister Mansukh Mandaviya chuan AIIMS, Delhi-ah hmanpuin, Road Transport and Highway Minister Nitin Gadkari pawhin Maharashtra, Nagpur-ah International Yoga Day hi a hmanpui bawk.

Union Home Minister Amit Shah chuan a Twitter-ah International Yoga Day chibai bukna dahin,"Yoga hi India-in rohlu a neih, khawvel tana a pek ve a ni. Khawvelin an hriatna tur atan Modi-a'n nasa takin a bei a, tunah chuan khawvel mi tam takte nunphung a ni tawh a ni," tiin a sawi.

International Yoga Day hman hi kum 2014-a PM Modi-a'n UN General Assembly-a thu a sawinaa a rawt niin, a kum leh aṭangin hman ṭan a ni. Kumina International Yoga Day thupui hi 'Yoga gor Vasudhaiva Kutumbakam' tih niin, 'Khawvel pakhat-chhungkaw pakhat anga kan nunna atan Yoga' tihna a ni.