Prime Minister Narendra Modi leh Elon Musk inkawm

Ni thum cham tura US-a zin mek, Prime Minister Narendra Modi chu Thawhlehni khan New York-ah Twitter neitupa, Elon Musk nen an inkawm.

Lotte New York Palace Hotel-a an inkawm zawh hnu hian Tesla CEO, Musk hian inkawmna ropui tak an neih thu a sawi. "India hma hun tur hi a nghahhlelhawm tak zet a ni. India hian ram lian dang zawng zawng aiin hma hun a nei eng zawk a ni", a ti. "Modi hian India tan thil dik leh ṭha a duh a, company thar tan pawh a inhawngin chutiang chu a thlawp tlat tur thu a sawi," tiin, Modi-a fan a nih thu a sawi.

Modi pawhin Musk nena an inkawm chungchang hi Tweet-in, thil chi hrang hrang an sawi dun thu a sawi. Ram mamawh tur thil aṭanga tisa piah lam thleng an sawi dun thu a sawi. Elon Musk-a'n Twitter a lei hma, kum 2015 khan PM Modi leh Musk-te hi California-a Tesla factory-ah an lo inkawm tawh a ni.

SpaceX neitupa hian India ramah an broadband internet service Starlink rawn bun a duh thu sawiin, thingtlang mite'n internet access an neih phah a beisei thu a sawi.

PM hian New York-ah hian American astrophysicist, Neil De Grasse Tyson pawh kawmin, ani bakah hian professor Nassim Nicholas Taleb, lehkhabu ziaktu Robert Thurman leh sumdawng, Ray Dalio pawh a kawm bawk.