Health Ministry-in khaw lum zualna UP leh Bihar-ah mithiam tir dawn

Union Health Minister Mansukh Mandaviya chuan Thawhlehnia mithiamte nena meeting an neih hnuah thuchhuah siamin, Union Health Ministry-in khaw lum zualna, Bihar leh Uttar Pradesh-a khaw lum avanga dam lohna leh vantlang hriselna endik kawnga pui turin mithiam a tirh tur thu a sawi.

Minister Mandaviya hian Health Ministry-in kum tirah khaw lum hmachhawn tura inbuatsaih a ngai tih an sawi tawh thu tarlangin, in enkawl dan tur, damdawi leh ORS, tui in tur bakah taksa sahal veng thei tui ril lamte nei ṭha tura a hrilh tawh thu a sawi. "Tun hnai chhoah state tam takin khaw lum an tuar nasa a, hei hian zir chianna leh a hun taka kan hman theih inbuatsaihna ṭha pawimawhzia a lantir a ni," a ti.

Thawhlehni meeting-ah hian mithiamte chuan state hrang hranga khaw lum dan chin bakah central agency-te inbuatsaihna leh harsatna tawkte enkawlna tur hmanrua, damdawi in; a hun taka awmze nei taka enkawl thei tura buatsaih a nih dante an sawi. Meeting-ah hian Union Minister of State for Health, Bharati Pravin Pawar bakah NITI Aayog (Health) member Dr. VL Paul, Union Health Secretary Rajesh Bhushan leh Health Ministry official ṭhahnem tak an tel.

State hrang hrang, a bikin India hmar lam state-ahte hian tun hnaiah tawrh hrehawm khawpin khua a lum zual a ni. Health Ministry hian Indian Meteorological Department chu en leh hriatthiam awlsam zawka khawchin tichhuak thin tura an ngen thu a sawi.