Human rights activist-te'n Modi-a zilh turin Biden an phût
Washington, US-a human rights activist-te chuan US President Joe Biden chu an rama cham mek, Prime Minister Narendra Modi zilhhau tura an duh thu an sawi.
Activist-te chuan India-a mihring zalenna palzut a ni leh, mimal dikna leh chanvo dinhmun a tlak hniam nasatzia chu ram hruaitute pahnih inkara sawi maia fel thei a ni lo, an ti.
International Religious Freedom (IRF) Secretariat President leh Wilson Centre-a Global Fellow ni bawk, Nadine Maenza chuan Nilaini khan chanchinthar lakhawmtute kawmin,"Thil thleng kan hriatte kan haider thei lo a, kan en san thei hek lo. US pawh hian a haider tur a ni lo," a ti. Activist leh zirlai tam takin Modi-a chu human rights chungchangah US Congress hmaa insawi fiah tura phut turin Biden hi an ngen bawk.
Critics-te chuan Modi-a sorkarna hnuaiah hian press mite zalenna a tla hniam a, sakhaw zuitu tlem zawkte chunga hleihlenna a tam a, democracy hnuaichhiaha inthliarna chi hrang hrang a pung nasa hle tih an sawi. United Nations (UN) human rights-in 'tih bik neia inthliarna dik tak' tia a lo sawi, kum 2019-a Citizenship Act an pawm taka Muslim an thliar dan te, mimalin eng rinna pawh a pawm theihna constitution-in a pe chunga anti-conversion dan an siam thu te, Muslim tamna Kashmir hamṭhatna laksak an nih thu te an sawi chhuak bawk a ni.
US Congress-a Muslim hmeichhe member awm chhun pahnih, Ilhan Omar leh Rashida Tlaib te chuan US Congress-a Modi-a'n thu a sawi hunah boycott an tum thu an lo sawi ve ve tawh. Modi-a sorkar chu Muslim te laka tharum thawh ṭhin tiin an puh.
US Senator Bernie Sanders pawhin,"Modi-a'n Hindu ram din a tum lutuk avang hian India-a sakhaw zuitu nei tlem zawkte an chep a ni," a ti ve bawk.
IPI-in press mite zalenna sawipui turin duh
International Press Institution (IPI) pawhin Prime Miniter Narendra Modi sorkar hnuaiah critical journalist-te laka dik lo taka dan hman a hluar tih sawiin, US President Joe Biden chu press mite zalenna chungchang sawipui tura an duh thu an sawi ve bawk.
IPI chuan India-a press zalenna tla hniam zel chu tihtawp a ṭul thu leh, Biden-a pawhin an ram mai bakah, ram dang dinhmun thleng pawha a ngaihpawimawh a ṭul thu an sawi.
Kum 2014-a Modi sorkar a lo din aṭangin World Press Freedom Index-ah India hi 140-na atangin kuminah 161-naah a tla thla tawh a, a zawnin kum nga chhung chu internet shutdown thlen tamna ber ram a lo ni tawh bawk a ni. Modi-a sorkar hnu hian thu thehdarhtute chhui zui leh man a pung nasa hle a, thla hmasa khan IPI hian Modi-a hnenah open letter thawnin, India mite'n an fundamental right an hman theih nan, press leh mimal ang pawha an duh an sawi theihna dan chu vawn himsak tur leh chumi kawnga hmalakna chak zawk nei tura an phut thu an sawi.