CoWin data leak kaihhnawihah mi 1 man

CoWin portal atanga data leak chungchang chhuina kal zelah, Delhi Police Special Cell IFFSO (Intelligent Fusion & Startegic Operations) unit chuan Bihar-ah mi pakhat an man.

An mi man hian politician ṭhenkhat bakah sorkar officer leh mi ṭhenkhat mimal thil tam tak Telegram kaltlangin a thehdarh a ni. South East Asia Index chuan heng data leak-ah hian Covid-19 vaccine late Aadhar, voter ID, passport number leh phone number te a tel niin an sawi. Data ti-leak-tua rinhlelh an man hi a nu leh health worker te'n an pui ni a hriat a ni bawk.

Data leak te hi South Asia Index te'n vawi eng emaw zat an Tweet hnuah hriat a ni a, sorkar erawh chuan CoWin portal chu a him tih a sawi thung. Union Health Ministry chuan,"CoWin portal hi Health Ministry enkawl a ni a, OTP hmang chauha data te hi neih theih a nih avangin portal hi a him ṭha tawk," tiin a sawi.

Union Minister Rajeev Chandrasekhar chuan Telegram bot-in CoWin application-a data te chu phone number han chhut luha lo lang theiin a siam a ni tiin a sawi a, "Data te hi bot hmangin database hmun danga aṭanga lak an ni a, chu database chu data ruk khawm leh awm tawh sate atanga siam a ni. CoWin application emaw CoWin database hi an rawn luh chilh ta tihna a ni lo," tiin a Tweet bawk.

CoWin hi Aarogya Setu leh UMANG (Unified Mobile Application for New-age Governance) application te nena thlunzawm vek a ni a,Covid kaihhnawiha central leh state-a sorkar khawih thil tam tak awlsam zawka inhriattir leh inpek chhawn theihna atana buatsaih a ni.