NHRC-in West Bengal sorkar hnenah hriattirna pe

National Human Rights Commission (NHRC) chuan Nilaini khan National Commission for Protection of Child Rights (NCPCR) team chu Kolkata police-te'n lo tibuaia, kut an lo thlak avangin West Bengal sorkar hnenah notice an pe.

NCPCR team hian March 31 khan Kolkata-a Tiljala hmuna hmeichhe naupang thih dan rinhlelhawm an chhui laiin Kolkata police-te hian lo tibuaiin, an vau bakah kut thlakte pawh an nei a ni. Police-te hian dan bawhchhiain NCPCR team-in naupang thi nu leh pa an kawm laite hi an lo record bawk.

Police-te lakah hian IT Act bakah Indian Penal Code (IPC) hnuaia thubuai siamsak turin complaint an theh lut tih NHRC thupuangtu chuan a sawi. An complaint theh luh bawhzui hian NHRC chuan West Bengal Chief Secretary leh Director-General of Police te chu notice pe nghalin, Kolkata police leh NCPCR te inkara buaina thleng chungchang leh Tiljala-a hmeichhe naupang thihna chhui chhunzawm a nih dan report kimchang pe turin a ti a ni.

Notice an pekah hian NCPCR chu sorkarin dan ang taka a din, naupangte himna tur leh seilenna boruak ṭha siam tura thuneihna nei a ni a, naupangte venhimna dan Protection of Children from Sexual Offences (POCSO), Juvenile Justice, Right to Education (RTE) leh a dangte pawh endikpuitute an ni tih a sawi. NCPCR hian complaint lo lut ang zelin, naupangte venhimna lam a nih chuan anmahnia chhui leh bawhzui thei turin thuneihna an nei a ni, a ti bawk.