US Congress-ah PM Narendra Modi-a'n thu a sawi: 'India hi economy lian ram pathumna a la ni thuai dawn'

US-a cham mek, pPime Minister Narendra Modi chuan Ningani khan US Congress joint session-ah thu a sawi. PM Modi hi ram dang hruaitu zingah US Congress joint session-a vawi hnih thu sawi thei pathumna leh, India Prime Minister zinga vawi hnih thu sawi thei awm chhun a ni. Kum 2016-a Barack Obama President lai khan a lo sawi tawh bawk.

US Congress-a a thu sawiah Prime Minister chuan firfiaka chetna thleng ṭhin chu do a ṭulzia sawiin, New York-a 9/11 thlen aṭanga kum 20 chuang a ral tawh hnuah leh, Mumbai 26/11 hnua kum 10 chuang a ral hnuah pawh firfiaka chetna hi khawvel tan thil hlauhawm a la ni reng, a ti. "Firfiakte hian lan dan leh tihdan hrang rawn nei ṭhin mah se, an duh leh thil tum chu a ngai reng. Firfiaka chetna hi mihringte hmelma a ni a, ngaihtuah nawn ngai miah loin kan bei let tur a ni. A lo pui ṭhin leh lo thlawp ṭhinte pawh kan hneh vek a tul,' tiin a sawi.

China leh India inkar pawh sawi langin,"Indo-Pacific-ah ngaihdan leh tum thuhmun zau tak kan nei a; tuipui kaltlanga inzawmin, international law zawm chung leh thuneitu bik awm loin, ASEAN hnuaia inzawm vekin kan awm a ni," tiin, khawvel pum ralmuanna chu ram zawng zawngin UN Charter an zawm a, midang zalenna leh ramri inzahsak a, innghirnghona pawh tharum tel loa an sawi fel theih leh theih lohah a innghat a ni, a ti.

Ukraine buaina chungchang a sawinaah Modi hian mipui hmaa chiang taka a ngaihdan a sawi tawh thu a sawi a,"Tun hi indo hun a ni tawh lo, midang biangbiak thiamna leh inremna siam thiam hun a ni tawh," tiin a sawi bawk.

PM Modi hian India leh US inzawmna sawiin, tun kum tlemte ral ta chhungin AI- Artificial Intelligence lamah hmasawnna a nasa a, hemi rual hian AI dang, America leh India inzawmna pawhin hma a sawn nasa hle tiin, "Ram venhimna lam thilah tun hma chuan mi hrang kan ni a, tunah chuan US hi ram venhimna ralthuam lama India ṭhian tha ber a ni tawh a ni" a ti.

"Democracy hi mihring nunphung, kan ngaihtuahna leh khawsak dana zalenna petu a ni. India hi hriat theih chin ata hetiang nunphung ngaihlua a zawmtu a ni hi a ropui hle. Democracy chawi nun zelna atan hian India hi Democracy nu nih tling a ni," a ti. Democracy chu mihring intluk tlanna leh zahawmna petu a nih thu a sawi.

Modi chuan India mi tld 1.4 te aiawh nih a, US Congress-a thusawi thei nih hi a lawmawm a tih thu leh, vawi hnih sawi thei nih ngat phei chu ropui dangdai a tih thu a sawi. PM Modi-a'n US Congress-a a thusawi hi Congressmen leh Senator za chuang bakah, US Congress joint session chhimtu Indian-American tam takin an ngaithla a ni.