India-in NASA Artemis Accord zawm

National Aeronautics and Space Administration (NASA)-in thla leilung zir chianna tur atana ram hrang hrangte thawhhona tura a duan, Artemis Accord chu India chuan sawmna a dawn hnua thla tam tak chhanna pe loa a ngawih hnuah a zawm dawn thu a puang.

Ningani khan Prime Minister Narendra Modi chuan he thutlukna hi puangzarin, ram dang 26 te'n an zawm tawh thla leilung zir chianna tur, NASA Artemis Accord chu zawm ngei ngei ngai ni lo mah se, South Asian ram angin an zawm thu hi a puang a ni.

"Vawiinah hian vansang zirna tura thawhhonaah kan tel ta. Heihi India hmasawnna ropui tak a ni," tiin US-a cham mek, Modi chuan White House-a press conference a neihnaah a sawi.

India hi vansang zirna lama hnathawhna hmun tha tak a ni chho mek a, satellite leh launch vehicle bakah vansanga hmanraw mamawh siamtu za chuangte'n bul ṭanna hmun atan India hi an hmang mek a ni. Hetiang lama investment pawh a pung nasa hle a, sorkar leh mimal thawhhona awm theihna tur atan ruahmanna pawh kalpui mek a ni.

October 2020-a ram pasarihin inthuruala bul an ṭan, Artemis Accord-ah hian vansang kalna nei ram zingah China leh Russia chiah an tel lo. Tun kar tir khan Ecuador pawhin a lo zawm thar ve tawh bawk a ni. Artemis Accord bul ṭantu zingah hian US, UK, Australia, Canada leh Japan te an tel.