PM Modi hnenah Egypt chawimawina sang hlan

Prime Minister Narendra Modi chu Inrinni khan ni hnih cham turin Egypt khawpui, Cairo a thleng a, nimin khan Egypt President Abdel Fattah El-Sisi chuan an ram chawimawina sang, 'Order of the Nile' a hlan.

Prime Minister Modi hi kum 1997 hnua India Prime Minister zinga Egypt ram tlawh hmasa ber a ni.

Nimin khan Egypt President Abdel Fattah El-Sisi chuan Cairo-a Presidential Palace-ah meeting neiin, trade leh investment, energy leh ram pahnih mipuite inkar inzawmna ṭha zawk siam dan turte an sawi dun. Sisi hi kumin Republic Day lawmnaah khan chief guest a lo ni tawh a, India-ah hian kumin leh 2015 inkarah tum hnih a lo kal tawh bawk.

Nimin vek khan Modi hian Cairo-a 11th century Al-Hakim Mosque a tlawh a, Heliopolis War Cemetery-ah Indopui II-na hunlaia Egypt leh Palestine-a India sipai nunna chan, mi 4,000 dawnte zahna a hlan nghal a ni. He hmun hi kum 26 chhunga India Prime Minister in a tlawhna hmasa ber a ni.

Prime Minister Modi cham chhung hian, India chuan Egypt hi 5 billion man hu ralthuam leisak tura inremsiamna a siampui beisei a ni. India hian G20 meeting-a tel turin Egypt hi a lo sawm tawh bawk. Egypt ram economy hi tun dinhmunah a ṭha lutuk lo a, India hian ṭanpuina tur sum theh chhuah tur pawh a puan rin a ni bawk.