Eptu party 14-te'n 2024 Lok Sabha inthlan chuhho an tum

Bihar khawpui, Patna-a eptu party-te meeting chuan thuchhuah siamin, kum 2024 Lok Sabha inthlan lo awm turah central-a BJP kaihhruai sorkar paihthla tura inthlan chuhho an rel thu an puang.

Zirtawpni liam taa eptu party-te meeting-ah hian party hrang hrang 15 telin, party 14-te chu meeting zawha press conference-ah an inlan. Aam Aadmi Party (AAP) erawh chuan Delhi-a sorkar laipuiin ordinance a siam duh loa hma an lak meknaah Congress-in a pui phawt a nih loh chuan an thawhho a rem loh thu an sawi.

Eptu party-te kal dan tur leh hmalak dan tur hi July 10 emaw 12-a an inhmuh khawm leh hunah an rel dawn niin a lang a. Meeting chairman tur, Congress hruaitu, Mallikarjun Kharge chuan,"BJP sorkar paih thla tur hian state hrang hranga hma kan lak dan tur ṭheuh rel a ngai dawn a ni," a ti.

Congress hruaitu tho, Rahul Gandhi pawhin,"Inan lohna tam tak nei mah ila, rilru zau tak leh kan duh leh beiseite tinung turin thawhho kan rel a ni," tiin a sawi ve bawk.

Meeting thlengtu Bihar CM Nitish Kumar chuan ram pum tana ṭha tura an ngaih thil ti an nih thu leh, BJP chuan India sulhnute thlak danglam a tum thu a sawi a, an meeting leh hunah an thawhho dan tur leh hmalak dan tur an rel tur thu a sawi. "Meeting ṭha tak kan nei thei a, hruaitu hrang hrangte pawhin an duh dan leh ngaihdan an sawi a, hemi atan hian eptu party hruaitute chuan thawho kan tum ta a ni," a ti.

Meeting lai hian AAP hruaitu Arvind Kejriwal chuan sorkar laipuiin Delhi-a dan lailawk a siam (ordinance) chungchanga duh lohna lantirpui turin Congress hi a sawm a, mahse Kharge emaw Rahul Gandhi emaw hian chhanna mumal tak an pe thei rih lo. West Bengal CM, Mamata Banerjee chuan meeting zawha a hrana sawiho mai tur leh, AAP thil phut chu tun meeting-a sawiho tur thil pawh a nih loh thu a sawi.

Mamata hian meeting hmasa ber Patna-in a thleng chu mipui hmalakna lian tak hringtu a nih a beisei thu a sawi a. Inthlan leh hunah mi pakhat rorelna hnuaia kunna sorkar (NDA) hi a piang leh a nih chuan inthlan a awm leh tawh ngaia a rin loh thu leh, anni chu eptu party ni lo a, India khua leh tui, India hmangaihtu tak takte an nih thu a sawi. Meeting-a kalte chu inpumkhat an nih tawh anga lungrual taka BJP sorkar an beih a tul thu a sawi bawk.

National Conference hruaitu, Omar Abdullah pawh meeting-ah hian telin,"Kashmir aṭanga Kanyakumari thlenga party-te hi thuneihna chan duh vang ni loin, India danpui thuthlung chhan him tura lo kal kan ni," tiin a sawi. CPI-M hruaitu, Sitaram Yechury pawhin India ram, mimal leh sakhua zalenna ram a nihna chu vawn him duh avanga kal khawm an ni tih a sawi.