AAP hruaituin Defence Minister thusawi a chhang

Defence Minister Rajnath Singh-a'n Aam Aadmi Party (AAP) kaihhruai Punjab sorkar chu state chhunga dan leh hrai ken kawh kawngah a hlawhchham niin a sawi a, hei hi AAP MP Raghav Chadha chuan chhang letin, Punjab-a Bhagwant Mann-a siam AAP sorkar hian dan leh hrai ken kawh kawngah hma an sawn nasa hle zawk a, AAP sorkar a din hnu hian hmasawnna hi a nasa leh zual a ni, a ti.

Chadha chuan,"Kan Defence Minister hian thu dik lo a lo hre palh niin a lang, Punjab hi Bhagwant Mann-a hnuaiah hian a ṭhang nasa hle a, kum 10 ral ta chhunga an ṭhan nasat ber tum a ni hial ang," tiin a sawi.

Chadha hian sawi zelin, Rajnath Singh chu state dang dinhmun a sawi hmain Manipur-a buaina thleng mekahte mawh la ngam tur leh, mipui tam tak thihna leh in leh lo tlan sante ngaihsak turin a duh thu a sawi a. Delhi-a suahsualna pung nasa lutuk pawh ngaihven a ṭul thu sawiin, tun hnaia inthahna thleng hrang hrangah Union Minister dem zawng hian a sawi lang a ni.

Inrinni khan Rajnath Singh hian Chandigarh-a a thu sawinaah,"Ram chhunga rorelna chungchangah Punjab sorkar chu a hlawhchham a, a tihtur tih kawngah nasa takin a hnufual a ni," tiin a sawi.

He a thu sawi hi AAP MP, Raghav Chadha hian chhang letin,"Delhi leh Manipur hi BJP kaihhruai central sorkar hnuaia awm an ni a, harsatna hrang hrangte hian an rorel fel loh vangin zual lam a pan zel a ni tih ka sawi ve duh," tiin Rajnath Singh hi a chhang.

Delhi-a dan leh hrai ken kawh chungchangah central-a BJP sorkar leh AAP hruaitute hi ṭawngkamin an inbei nasa thei hle. Delhi police-te hi Central-a Union Ministry of Home Affairs hnuaia awm an ni.