Wrestler-te'n an nawrh titawp; court-ah an bei chhunzawm dawn

Hmeichhe wrestler ṭhenkhat chunga mipat hmeichhiatna lam hawia mawi lo taka chea puh,Wrestling Federation of India (WFI) hotu, Brij Bhushan Singh laka lungawi lohna lantirtu, wrestler-te chuan nawrh an huaihawt aṭanga thla nga a ral hnuah, Pathianni khan court lama chin fel tura an kalpui chhunzawm tawh tur thu an sawi.

Nawrh huaihawtnaa hma latu ber, Vinesh Phogat, Sakshi Malik leh Bajrang Punia-te chuan sorkarin a tiam anga Brij Bhushan Singh laka thubuai a ziah luh tak avangin, an nawrhna titawp rih tur an nih thu hi an tweet hlawm a ni.

"He case-ah hian wrestler-te'n rorelna dik an hmuh hma chuan kan bei zel ang, mahse, khawlaiah ni tawh loin, court-ah a ni tawh zawk ang," tih leh "WFI siam ṭhat chungchangah leh, hruaitu inthlan chungchangah chuan tiam kan nih angin hmalak mek a ni. Sorkarin min tiam anga July 11 a inthlan hunah a hlawhthlinna kan hmuh ngei kan beisei," titein an tarlang.

Twitter kaltlanga an thutlukna an puan hnu hian, Phogat leh Malik-te chuan social media chawlhsan rih an tum thu an sawi bawk.

Wrestler-te'n an nawrh an tihtawp chhan hi police-te'n Singh laka sexual harassment, invauna leh mi enthlak thubuai an ziah luh tak vang a ni. Singh erawh chuan an puhna hi a pha vek thung. Heng thubuaiah hian thiam loh a chang a nih chuan kum thum lung in tantir theih a ni ang. Singh hi BJP MP a nih anga sorkara a hna zawng zawng awltir rih a ni.

Kum 66 mi Brij Bhushan Singh lakah hian wrestler hmeichhe pasarihte chuan complaint theh lutin, mutpui tura a beisei ṭhin thu leh a nawr luih fo thin thu an sawi. Heng wrestler-te hian January thla aṭang khan Singh-a laka lungawi lohna lantir hi an ṭan tawh a ni. Hmalakna a awm lawk loh avangin April aṭang khan nasa zawkin nawrh hi an kalpui a, kawngpui aṭanga pawh leh hnuhsawn luih an nih ṭumte pawh a thleng hial a ni. Olympic leh Asian games medal lo la tawh an awm nual avangin sorkar nawrna atan an medal lakte Ganga luia paihte an lo tum tawh bawk.