US leh Egypt a tlawh hnuah PM Modi a rawn haw

Ni ruk chhung thanga US leh Egypt tlawha hun a hman hnuah, Pathianni zan khan Prime Minister Narendra Modi chu India-ah a rawn haw leh ta. A zinnaah hian inremna thuthlung pawimawh tak tak a ziahpui a ni.

Modi hi June 20 khan US thlengin June 21-ah New York-a UN Headquarters-ah International Yoga Day vawi 9-na a hmanpui. White House-ah a lawmnate buatsaih niin, US Congress joint session-ah thu a sawi a, Ningani khan US President Joe Biden nen an inkawm a ni. White House-ah hian Biden-te nupain chawhlui an lo buatsaihsak bawk.

Inrinni khan PM Modi hian Egypt thleng lehin, Egypt Prime Minister Mostafa Madbouly chuan airport-ah a lo hmuak a. Egypt President Adbel fattah El-Sisi nen inkawmin Arab ram chawimawina sang ber 'Order of the Nile' a lo hlan a ni. Modi hian PM a nih hnuah Egypt a tlawhna hmasa ber a ni.

Pathianni zan khan Modi hi Delhi airport-ah rawn thlengin Union Minister of state for External Affairs, Meenakshi Lekhi leh BJP President, JP Nadda te'n an lo dawngsawng a, anni bakah hian BJP hruaitu eng emaw zat leh MP thenkhat, Harsh Vardhan, Hans Raj Hans leh Gautam Gambhir te pawhin Modi hi an lo hmuak a ni.