Nirmala Sitharaman-i'n Barack Obama a khak

Prime Minister Narendra Modi chuan US-a press conference a neihnaah India-a Muslim-te dinhmun leh beih an tawh nasatzia chungchangah zawhna tam tak a dawng a, Pathianni khan Nirmala Sitharaman chuan hemi chungchangah hian Modi chu chhanin, US President hlui Barack Obama pawh a khak tel nghal.

News conference a neihnaah Nirmala chuan,"US-a PM press conference-a a thusawi aṭang khan a chiang mai lo em ni? 'Sabka Sath, Sabka Vikas' thuthlung kalpui turin sorkarin hma a la mek a, eng hnam leh pawl mah thlei bik a nei lo," tiin, Congress leh party dangte chu inthlana hnehna an chan loh avanga fiahna awm si loa thu tling lo sawi uar luiah a puh. US President hlui Barack Obama pawh India-a Muslim-te chungchang a sawi danah khak telin, Muslim tamna ram parukte chu Obama sorkar laia bomb hmanga beih an nih vek thu a tarlang.

"Modi-a'n Prime Minister a nih chhunga chawimawina a dawn tawh 13 zinga paruk hi Muslim tamna ramte pek a ni," tiin, US-a India Prime Minister-in thu a sawi mek laia US President hlui pakhatin CNN-a India rama Muslim-te chungchang a lo sawi chhuak chu a hriatthiam loh thu a sawi. Obama-a'n India-a Muslim-te chungchag Modi-a sawipui a la tum thu a sawi chu ṭul lo a tih thu a tarlang bawk.