PM Modi zawhna zawttu reporter-in vauna tawk; White House-in reporter chunga thil thleng a dem

Prime Minister Narendra Modi-a'n kar liam taa US a tlawh ṭuma press conference a neihnaa zawhna zawttu, Wall Street Journal reporter, Sabrina Siddiqui chu a zawhna avangin India aṭangin online-a vau leh sawiselna a tawk nasa hle.

Sabrina Siddiqui chuan PM Modi hi India rama democracy dinhmun a zawt a, mahse he zawhna avang hian India ram aṭangin beihna a tawk a, Muslim a nihna zawn thlengin beih a ni zui. White House chuan reporter-in beih a tawk chu an dem thu a puang.

White House official John Kirby chuan Siddiqui-i'n beih a tawh dan chu White House-ah pawh an hriat thu a sawi. Kirby chuan,"Khawi hmunah pawh ni se, eng vang pawhin ni se, journalist-te beih an nih chuan kan pawm thei lo. He thil pawh hi kan dem tak zet. Kar hmasaa ram intlawhna boruaka democracy nihphung kan sawi leh lantir nen pawh khan a inkalh a ni," tiin a sawi.

White House press Secretary, Karine Jean-Pierre pawhin Kirby thusawi hi tuihnihin,"Press mite zalenna hi kan ngaipawimawh a, press conference kan neih chhan pawh kha a ni. Journalist-te beih leh vauna reng reng hi kan demin kan duh lo tak zet a, an hna an thawh avanga beih an tawk ngat phei chu kan duh lo leh zual," a ti ve bawk.

Siddiqui hian press conference neihnaah hian human rights group hrang hrangte'n India-a inthliarna leh sorkar sawiseltute beihna thleng ṭhin nia an sawi chungchangah Modi hi zawhna zawtin,"I sorkarna hnuaiah hian India-a Muslim leh hnam tlem zawk dinhmun chawi kang tur leh free speech vawnghim tur hian eng ang chiaha hmalak nge i inhuam?" tiin a zawt.

Modi hian chhangin,"I zawhna chu min zawh awm loh tak a ni. Democracy ram kan ni a, kan thlarau leh kan taksa hruaitu a ni. Democracy hi kan nunna leh kan innghahna, kan constitution-in min pek a ni," tiin a chhang.

He zawhna avang hian India mi tam takin Siddiqui hi online-in an bei zui a, a thil tum leh a pian leh murna thlenga sawi leh nuihzat a hlawh zui a ni.