India leh Pakistan-in palaite inkohsak tawn

Sorkar laipui chuan Thawhṭanni khan India rama Pakistan palai awm chu koin, Pakistan-a Sikh mite beihna thleng a duh loh leh a dem thu a hrilh. Ni hnih liam ta khan Line of Control (India leh Pakistan inkar)-a inkah hai puanna dan bawhchhiaa puhin Pakistan chuan an rama India palai koin a demna thu a lo hriattir tawh bawk.

Sorkar thupuangtu chuan kumin April leh June thla chhung ringawt hian Sikh mite chunga tharum thawhna hi report vawi li an dawn tawh thu leh, Pakistan hian a ram chhunga hnam leh sakhaw zuitu tlem zawkte chunga hleihlenna hi ngaihvena, la thutak tur leh, an chhuina report-te pawh pho chhuak ṭhin tura an duh thu a sawi.

Pakistan hian Islamabad-a India palai koin, Line of Control-a India-in silai a hmeh puah avanga civil mi pahnih thihna leh midang hliama an awm chu an lungawi loh thu leh, India sipaite' nin kah hai puan a nih hnua silai an hmet puak chu an dem thu an lo hrilh ve bawk a ni.

Pakistan Foreign Ministry chuan Pathianni khan thuchhuah siamin,"February 2021-a inremna tihnun thar, 2003 ceasefire understanding bawhchhiaa India sipaite'n civil mi an kap hi kan dem tak zet a ni," tiin a puang.

Indian Army erawh chuan Pakistan puhna hi phain, Pakistan aṭanga ralthuam nena luh ruk tum mi pathumte, Jammu and Kashmir-a Poonch district bula LoC atanga luh an tum lai an hmuh avanga kap an ni tih an sawi thung.