Eptu party-te'n nakkum inthlana seat inṭawm neih rel

Nakkuma Lok Sabha inthlanpui awm tur atana eptu party intel khawmte chuan, July thlaa Shimla-a meeting an neih leh hmain, an zinga tel party-te thawh dun tawhna state, Bihar, Maharashtra, Tamil Nadu leh Jharkhand-ahte seat inṭawm neih an rel.

State ṭhenkhatah chuan inbiakna an nei ṭan tawh ni a hriat a ni a, LS seat awm zawng zawng (543) ah hian candidate inṭawm neih vek chu a theih loh a, mahse, BJP candidate hnehna atana candidate inṭawm neih chu an duhthusam a nih thu an sawi. Eptu party hruaitu pakhat chuan,"Seat pakhat inṭawm, candidate pakhat neih hi en mai pawha rem sa a awm a nih chuan kan duh tlan a ngai," tiin a sawi.

Eptu party intel khawmte hian he seat inṭawmna dan hi Samajwadi party, Rashtriya Lok Dal leh Congress-te thawhhona Uttar Pradesh-ah chuan hman theih mai an beisei.

AAP sorkarna, Delhi leh Punjab-ah erawh chuan AAP leh Congress inkar boruak avangin eptute thawhhona a ṭhat mai ala beiseiawm rih lo. Eptu party-te inhmuh khawm ṭum khan AAP hruaitu Arvind Kejriwal chuan Delhi-a central-in ordinance an siam dodalpui tura Congress a sawmnaah thlawpna an hmuh zet loh chuan thawhhona an nei thei lo ang tiin a lo sawi tawh a ni. Hei vang hian AAP hi a tawp thlengin an thawhhonaah an tel thei dawn em an la chiang lo.

Eptu party-te hi thla tharah hian Shimla-ah a hma aia kokim zawka inhmuh khawm leh an tum a, party la sawm ve loh - IUML, VCK, All India Forward Bloc bakah RSP-te pawh sawm an tum. Kum 2024 Lok Sabha inthlan huna BJP beihna atana campaign au hla thuhmun neih an rel a ni.