PM Modi-a'n Uniform Civil Code hman vat a duh tih a sawi

22nd Law Commission-in Uniform Civil Code (UCC) hman chungchang zir chianna nei tura mipui leh sakhaw ṭhenkhatte ngaihdan lakna tur a buaipui mek laiin, Thawhlehni khan Prime Minister Narendra Modi chuan UCC chu hman vat a ngai tih sawiin, eptu party-te chu UCC hnawl tura hnam tlem zawkte fuihpawrhah a puh.

Prime Minister chuan UCC chu India constitution-ah pawh a awm thu leh, Supreme Court pawhin hmang tura a tih tawh laiin Muslim-te rilru hruai kawi nan leh tihthinrimna atana hman a nih thu a sawi. "UCC hmangin mi ṭhenkhat fuihpawrh an ni mek a ni. Engtin nge India hi dan pahnih hmangin a kal theih ang? Constitution chuan mitin chanvo ang khat min pe vek a ni.,Supreme Court pawhin UCC hman tur thu hi a pe tawh a ni. Eptu party-te hian vote zawn nan heng thil hi an hmang mai mai a ni," tiin Bhopal-a BJP mi leh sate intawh khawmnaah a sawi.

PM hian BJP chuan mi tihlawm tum leh vote zawn behchhana politics tenawm khelh chu an tum ve loh thu sawiin, triple talaq duhtute chuan Muslim hmeichhiate tan harsatna an siam a ni, a ti.

UCC hi sakhaw hrang hrang zuitute tan leh mimal thila dan inang khat hmanna tur a ni. He dan hian hian ro khawm, inneih, inṭhen, fa changtu tur leh inṭhen hnua inchawm zuina chungchangte a huam. India dan leh hraite hian a huam zau hle a, sakhaw hrang hrangte hian an sakhaw dan hman bik an nei ṭheuh a ni. Hei vang hian UCC hman ṭul tihna hi a lian hle a, India constitution-ah sawi lan a lo ni ve bawk a ni.