Eptu party intel khawmah BRS tel ve dawn lo

Telangana-a sorkarna siam mek, Chief Minister, K. Chandrasekhar Rao (KCR) leh a kaihhruai party, Bharat Rashtra Samithi (BRS) chu kum 2024 Lok Sabha inthlanpui neih tura eptu party intel khawmah an tel ve dawn lo.

Congress party hruaitu, Mallikarjun Kharge leh Rahul Gandhi-te nena Nilainia meeting an neih hnuah, BRS hi eptu party intel khawmah hian an tel dawn lo tih Congress chuan a puang a ni. Meeting hi All India Congress Committee (AICC) headquarters, New Delhi-ah neih a ni a, Congress General Secretary (Organisation) K.C. Venugopal, AICC Telangana in-charge Manikrao Thakare bakah Telangana-a Congress hruaitu, Pradesh Congress Committee (PCC) hotu A. Revanth Reddy, Lok Sabha MP Uttam Kumar Reddy, Renuka Choudhury, Madhu Goud Yakshi leh midang eng emaw zat an tel.

Meeting zawha press conference neihah, Thakare chuan BRS chu BJP sangawi zawnpui niin a puh a, Telangana CM KRC chu an state sum a chhungte tana hmangah a puh bawk. "KCR chuan BRS hi Congress ṭhatna, Maharastra-ah luhpui a tum a, hetianga an thiltih hmang hian BJP hi a pui a ni," a ti.

Lok Sabha MP Yakshi pawhin BRS leh BJP te chu thuhmun an nih thu leh, Congress President Kharji chuan eptu party intel khawma an tel loh tur thu meeting-ah a sawi chiang tawh a ni, a ti ve bawk.

Thawhtannia BRS hruaitu eng emaw zatin Congress an zawm hnuah Venugopal chuan, Telangana chu Rao-a sorkar leh a party BRS leh BJP inzawmna tenawm tak paihthla tura a inpeih tawh thu sawi.

K. Chandrasekhar Rao-a kaihhruai sorkar BRS (Telangana Rashtra Samithi tia hriat ṭhin) hi December 2018 assembly inthlanah khan hneh takin thlan tlin an ni a, tunah hian ram puma inzarpharh tumin hma an la mek a ni.