IIT Delhi-a foreign policy sawihonaah US palaiin thu sawi

India rama US ambassador, Eric Garcetti chuan Nilaini khan IIT Delhi-a 'Peace, Prosperity, planet, people a new chapter in US -India relation' tih thupui hmanga India foreign policy chungchang sawihonaah thu a sawi.

Eric Garcetti chuan Prime Minister Narendra Modi-a'n kar hmasa lawka US a tlawh tuma a awm ve thu leh chuta tanga India rawn let leh chiah a nih thu sawiin, US leh India hruaitute inkawmna boruak chuan ram pahnihte chu inzawmna ṭha tak neia a hmuhtir thu leh, khawvel hruai tura thawh dunna ṭha tak an neih theih thu a sawi. India chu US ṭhiantha tak leh ram hmasawn ber, hruaitu ṭha tak nei a ni, ati.

Garcetti chuan,"US leh India hruaitu hmaichhana inhmu chuan mite beiseina sang tak a pe ngei ang. Thil tum leh lawmna nasa tak pawh a awm ngei ang, mahse, rah ṭha chhuahin a taka hmalakna a awm ngei ang em tih erawh zawhna hran daih a ni," tiin a sawi. "Tun ṭuma India-in US a tlawh atang erawh hi chuan a taka hmuh tur hnathawh a awm ngei dawn tih ka sawi duh. Ram pahnihte inṭhianthatna piah lamah ruahmanna ṭha tak tak an siamte khan min tiphur a, kawng tinrenga India leh US chungnunna min hmuhtir a ni. Kan hnathawh dun tur hian khawvel a thlak danglam ngei ang," tiin a sawi chhunzawm.

"India leh US hian tum leh duhthusam thuhmun kan nei a, American dream leh Indian dream hi sawi hran theih a ni lo. Kan khawtlang leh chhungkaw tan hlawhtlinna kan duh a, kawng kan zawng a, thiamna kan zawng a, danglam tumin kan bei bawk a, chung zawng zawng chu kan ram tan kan ti ṭhin. Kan inzawmna hi a thuk hle a, chu chu kawng hrang hranga hmuh theih a ni," tiin, US-a ram dang zirlai visa pek tam ber chu India mi an nih thu te, US leh India insumdawn tawnna hlut zawng chu USD tld 191 aia tam a nih thu te, India chuan ram dang zawng aia US nena military exercise an neih tam bik thu leh, US-a thlan leh ruat sorkar official 20 chuang chu an ṭobula India niin an Vice-President Kamala Harris ngei pawh chutiang mi a nih thu te a sawi.