Senthilbalaji ban duh loah Tamil Nadu Governor-in CM a puh

Pawisa chheprelh thubuaia man, DMK hruaitu leh Minister ni bawk, Senthilbalaji chu Tamil Nadu Governor, RN Ravi-a'n bang tura a tih hnuah pawh Chief Minister M.K. Stalin chuan portfolio chelh si loa minister-a a la dah reng avangin Governor hian Chief Minister hi a khak.

Governor hian Ningani zan khan CM hi lehkha thawn lehin, Constitution article 154, 163 leh 164-in thuneihna a pek anga Council of Minister aṭanga Senthilbalaji ban tura May 31-a thurawn a pek tawh chu CM chuan June 15-ah lehkha thawn hmang vekin mawi lo taka chhang letin, CM chu uchuak taka duhsak bik nei a nih thu leh a thurawn kalh zawnga cheah a puh.

Ravi hian Senthilbalaji chu damdawi ina enkawl a nih avanga a chanvo chelhte minister dang hnena pek rih mai a, minister la nihtir chhunzawm a tum tih Stalin hian a hrilh thu a sawi. Thubuai chhuina fair tak neih a nih theih nana Senthil-a minister nihtir chhunzawm a duh loh laia Stalin-a'n minister a nih chhunzawm tur thu a puang mai chu mak a tih thu a sawi.

Governor chuan he thil chungchangah hian Union Home Minister Amit Shah-a'n thurawn a pek anga Attorney General ngaihdan a lak tur thu a sawi a, chumi hma chu Senthilbalaji banna tur thu a pek chu a nih ang anga awm rih tur leh, official-a chhanna pe vat turin CM Stalin chu a hriattir a ni.