Punjab CM hoin Jantar Mantar-ah Lungawi lohna lantir

Punjab chief minister Amarin­der Singh, a cabinet minister leh Congress MLA-te chuan nimin khan New Delhi-a Jantar Mantar-ah lungawi lohna lantirin an ṭhukhawm. 

Punjab hruaitute hian sorkar laipuiin farm law a siam duh lo a, an state-a loneituten lungawi lohna an lantir avanga state-a bungrua phur rel lut tur rel tihtawpsak an nih avangin lungawi lohna hi an lantir a ni. 

Jantar Mantar-a lungawi lohna lantirte chuan BJP kaihhruai sorkar laipui chu Punjab hrek beh a, ei tur tlachhama siam tumah an puh a, rel lut tur a tihtawpsak avangin mipui chakkhaite pawh a  indaih lo ṭan a, power plant tana hman tur lungalhthei leh thlasik thlai chinna atana leiṭha an mamawhte pawh an indaih lo chho tawh hle tih an sawi. 

CM Singh hian an lungawi lohna thu thlen tur leh, Punjab-in farm law thar a siamte sawipui turin President Ram Nath Kovind hmuh a tum a, mahse President hian meeting a neihpui duh tak loh vangin nawrh hi an huaihawt a ni. A tirah chuan Raj Ghat-ah nawrh hi huaihawt an tum a, mahse security thil avangin Jantar Mantar-ah zawk an insawn leh ta a ni. 

Railway ministry chuan Farm law duh lohna lantira Punjab loneituten nawrh an huai­hawt vangin Punjab-a bung­raw phur rel lut tur a titawp a, mahse rel lut tur a tihtawp hi lonei­tuten rel kawng an dan an tihtawp tawh hnuah nia sawi a ni thung. 

Sorkar laipuiin farm law thar pathum a siam chu ram chhung hmun hrang hrangah eptu party-te bakah loneituten na takin an sawisel a, Punjab state assembly chuan sorkar laipui farm law siam thar hi hmang loin, an state-a hman tur bik farm law thar chu October 20 khan a lo pass tawh a ni. State farm bill an pass takte hi Governor Virendra Pal Singh Badnore pawmpui tura thawn a ni tawh a, mahse Governor hian a la tikhawtlai rih a ni.