Congress-in UCC chungchangah an dinna ngaia an din thu an sawi

Congress Parliamentary Strategy Group chuan Inrinni khan meeting neiin, ram puma dan in ang hmanna tur, Uniform Civil Code (UCC) chungchangah an party dinna chu a la ngai reng tih an sawi.

Meeting zawha chanchinthar lakawmtute an kawmnaah, UCC chu Prime Minister Narendra Modi-a'n hman vat duhin nawr tum mah se, a hman dan tur leh a dan siam turah zir leh en chhin tur engmah pawh an la siam loh avanga engmah sawi tur an neih loh thu leh, PM thusawi chu ui bauh angah chauh ngaia an en liam mai mai rih tur thu party General Secretary (Communications) Jairam Ramesh chuan a sawi a ni.

Ramesh chuan,"June 15-a kan party thuchhuahah khan kan la ding reng a, June 15 leh July 1 inkarah hian eng thil thar mah a la awm lo. Sorkar hian UCC hmanna tur kawng hian eng hmalakna mumal mah a la nei lo a, mipui hmuh theih tura bill put luh tum pawh a awm kan la hre lo," a ti.

Vawiin hian Rajya Sabha-a BJP MP, Sushil Modi kaihhruaina hnuaiah Parliamentary Standing Committee on Law te chu an ṭhu khawm dawn a, meeting-ah hian Law Commission aṭanga report an dawn pawh sawiho tur zingah a tel thu sawiin, UCC hi a tel ngei dawn, tiin Ramesh chuan a sawi. He committee-ah hian Congress pawhin member panga neiin, an party thuchhuah leh 21 Law Commission report anga UCC hman hi a ṭul kher lo tihah an din tur thu a sawi.

Bahujan Samaj Party (BSP) hotu, Mayawati pawhin nimin khan UCC hman hi an party chuan an duh a, mahse BJP kalpui tum dan chu an duh lo tih a sawi. Mayawati hian,"UCC chungchang hi constitution-ah inziak mah se, hman ngei ngei tur tih erawh a inziak lo," tiin a sawi. UCC hman leh hman loh hi mipuite duh danah leh an hriat chian ngei hnuah chauh hman tur a ni, tuna BJP-in kalpui an tum dan hi chuan ram pumah buaina bak a thlen lo ang, a ti.

UCC chungchanga inhnialna hi June 28-a Bhopal-a BJP party worker-te hmaa Modi-a thusawi hnuah a rawn alh chho leh a, Modi hian India chuan dan pahnih a hman kawp theih loh thu leh UCC chu hman vat a ṭul tih thu hi a sawi a, eptu party-te chu Muslim-te fuihpawrh zawnga UCC chungchang sawiah a puh bawk. He a thu sawi hian ram puma party hrang hrangah ngaihdan inhnialna a siam nasat phah a ni.