Maha Dy. CM atan NCP hotu Ajit Pawar la lut

Nationalist Congress Party (NCP) hruaitu Ajit Pawar leh an party MLA 29-te chuan nimin khan Maharashtra-a Eknath Shinde kaihhruai Shiv Sena party leh BJP-te ṭangrual sorkar an zawm a, Ajit Pawar chu Deputy Chief Minister atan lak luh a ni nghal bawk. Deputy CM a nih ṭum thumna a ni.

Pawar hi Maharashtra assembly-ah Leader of Opposition a ni. NCP hian MLA 53 an nei mek a, party MLA zinga a tam zawkin an thlawp niin nimina Deputy CM atana lak luh a nih hnuah a sawi.

Kum 2019 Maharashtra-a BJP kaihhruai sorkarah khan Ajit Pawar hi Deputy Chief Minister lo ni tawhin, Uddhav Thackeray-a kaihhruai sorkar, Maha Vikas Aghadi sorkar a din khan a zawm leh a, Deputy Chief Minister-ah dah a ni leh bawk. Tun ṭuma hian Shiv Sena-BJP sorkarah BJP mi Devendra Fadnavis nen Deputy CM hna hi an chelh dun leh dawn ta a ni.

NCP thupuangtu, Mahesh Tapase chuan Ajit Pawar-a'n ṭangrual sorkar a zawm chungchangah,"Heng zawng zawng hi BJP ruahmanna a ni. Party hruaitu, hnathawktu leh district president zawng zawngte pawhin NCP chief Sharad Pawar hi an thlawp zawk vek a ni," tiin a sawi.