Raipuar leh nau piang hlimte ni 1,000 chhung enkawl dawn

Tamil Nadu Health Minister Ma. Subramanian chuan Inrinni khan 'First 1000-Best Healthy days' scheme tlangzarhin, he scheme hnuaiah hian nu nau pai lai leh nau piang hlimte ei leh in chu uluk taka vil leh en zui a ni ang.

Arcot bula Thimri block Primary Health Centre-a scheme tlangzarhna hun a hmannaah hian Subramanian chuan nu nau pai laite'n rih dan tur dik tak an neih theih nan leh, nau piang hlimte'n an mamawh ang enkawlna an hmuh theih nan scheme chu ruahman a nih thu sawiin, raipuar 101 te ṭanpuina tur sum a sem nghal bawk.

Subramanian chuan a sawi zelnaah he scheme hian Maternal Mortality Ratio (Rai cheh emaw nu nau chunga thi) bakah, Infant Mortality Rate (nausen kum khat tlin hmaa thi) a tihhniam theih a beisei thu a sawi. Rai laia anaemia ven na leh, nau piang zang lutuk tur te, nau piang hlimte natna dona kawnga an taksa tihchak nan pawh he scheme kaltlang hian hma an lak tur thu a sawi.

Scheme hian tun kum hnih chhunga nau piang zawng zawngte chu a huam phawt dawn a, nau pai laia enkawltu tur leh mumal taka kaihruaitu tur pek vek an ni bawk ang. Block, district leh state level thlenga thliarin he scheme hmang theite chu enkawl vek an ni ang tiin Health Minister hian a sawi bawk.

First 1000-Best Healthy Days hi state chhunga Community Health Centre (23) zawng zawngah hman tur a ni a, district 14 chhunga Primary Health Centre 116-ah hman bawk tur a ni. He scheme hnuaiah hian kum hnih chhungin nau piang 74,400 enkawl hman tura beisei a ni.