NCP-in Ajit Pawar ban tura phutin petition theh lut

Nationalist Congress Party (NCP) chuan Ajit Pawar leh party MLA dang 8, Pathiannia an party chhuah sana Maharashtra-a Shiv Sena-BJP sorkar zawmtute chu ban tura phutin, Assembly Speaker hnenah petition an theh lut.

Maharashtra state NCP chief, Jayant Patil, MP Supriya Sule leh Opposition Leader, Jitendra Awhad-te chuan Thawhtanni zan tlai tawh taka press conference an neihnaah petition an theh luh thu hi an puang a."Maharashtra Assembly speaker Rahul Narwekar hnenah Pathiannia Shinde-Fadnavis-a sorkara minister atana lak luh thar NCP MLA pakuate ban tur hian petition kan theh lut a ni," tiin Jayant Patil chuan a sawi.

NCP hian Election Commission of India hnenah pawh ziaka thlenin MLA pakuate hi party kalh zawngin an che a, Minister ni tura lak luh an nih chiah khan disqualify theih an ni, tiin Patil chuan a sawi bawk.

Jayant Patil hian Ajit Pawar-a lam tang MLA chhuak thenkhatte'n amah leh an party hotu lu ber, Sharad Pawar an la biakpawh reng thu a sawi a, "Thil kan la sawiho reng a, an lo let leh vat ang. Thutlukna an siam hma khan thlan tlin an nihna constituency tlawhin amahni vote-tu mipuite ngaihdan la hmasa tur an ni a, chumi hnua Sharad Pawar-a chhuah san chauh tur an ni. Tunah chuan Minister-a lak luh mi pakuate lakah chauh action kan la a, MLA dangte lakah erawh engmah kan la ti rih lo," a ti.

"Kan MLA te nen hian kan la inbiakpawh reng avangin party an chhuah san kan la ti thei lo a, an chungchang sawi leh ngaihtuah pawh kan ti thei rih lo. Mipuite hian party chhuah sana party dang an zawm hi an pawmsak thei dawn lo a, an lo let leh ngei ngei hi a ngai a ni," tiin Patil chuan Maharashtra mipuiin Sharad Pawar-a an thlawp tlat thu a sawi.