Nihna lem hmanga GST pe 12,500 hmu chhuak

Central Board of Indirect Taxes and Customs (CBIC) hotu, Vivek Johri chuan Goods and Services Tax registration hmuh nana midang Aadhar card leh PAN card hmang ṭhin an awm tih an hriat thu sawiin, CBIC chuan registration lem neite man tura beihpui an thlaknaah nihna lem hmanga GST return file ṭhin 12,500 an hmuh thu a sawi.

Tax authority-te ṭhu khawm chuan nihna lem hmanga GST pe ṭhinte man tur hian biometric authentication an hmang tawh dawn tih an sawi a, supplier-te'n chhiah pe si lo a Tax return an dawn theihna, Input Tax credit (ITC) pawh khirh zawka kalpui an tum tih a sawi bawk.

Company-te thawhpui director emaw, aiawh finfiah ngeite emaw chuan biometric authentication hmangin registration thar an tih a ngai tawh ang a, GST ti tawh sa sumdawngte pawh tax officer-in ITC hmuh nan chauha din ni a a rinhlelh chuan biometric anthentication hi an tih ve tho a ngai tawh bawk ang.

Johri chuan CBIC hotute chuan sumdawnna leh company zawng zawngte'n address dah a dik ngei em tih fiahna tur atan geo-tagging tih vek an tum bawk tih a sawi a, hei hi state ṭhenkhatah bul ṭan tawh niin, infrastructure leh an mamwh dang an hriat theih hunah India ram puma kalpui an tum tih a sawi.

"OTP authentication kan kalpui ṭhin a, tunah chuan biometric pawh kan hmang tel tawh ang. Hemi hmang hian tu pawh kan rinhlelh chu Aadhar centre-a an biometric finfiah tura an kal a ngai tawh dawn a ni," tiin Johri chuan a sawi a ni.