Gujarat HC-in Rahul Gandhi case stay dilnaah thutlukna la siam lo

Intihhmingchhiatna thubuai avanga May 2-a Gujarat High Court-in thiam loh a chantir, Congress party hruaitu Rahul Gandhi-a'n court-in hremna a pek 'stay' rih tura a ngen chungchangah, High Cour hian thutlukna a la puang lo.

Gujarat High Court hian Gandhi-a ngenna theh luh chungchangah hian June 5-a nipui chawlh an hman zawh hunah thutlukna a puan tur thu hi an sawi a, mahse, court hawn a nih leh hnuah pawh kar thum zet a ral tawh chung pawhin engmah puan a la nei lo a ni. March thla khan Gujarat High Court hian intihhmingchhiat thubuaiah Rahul Gandhi hi thiam loh chantirin, kum hnih tang turin a hrem a ni.

Gandhi aiawha ding, senior lawyer, Abhishek Manu Singhvi chuan Justice H.M. Prachchhak-a'n stay an ngenna chu a ngaihthlak tawh thu leh hremna tihkhawtlai chu a duh loh niin a sawi a, "Intihhmingchhiata inpuhna avanga hremna sang ber inpek vawi khatna a ni," a ti.

Rahul Gandhi laka thubuai theh luttu hi BJP mi, Purnesh Modi niin, Gandhi-a thusawi,"Eng vanga rukru zawng zawng hian Modi tih hming nei nge an nih?" a tih chu Modi chhungkua tihhmingchhiatna a ni tiin complaint a theh lut a ni.

Thiam loh chantir a ni hnu hian Gandhi hi Lok Sabha member a nihna hlihsak nghal a ni a, a hremna stay tura a ngenna hi pawmsak a nih chuan Lok Sabha member hlihsak a nihna hi sut leh theih a ni ang. April khan Gujarat session court-ah kalin an hremna chu tikhawtlai rih tur hian a ngen a, mahse, court hian bail bak a lo phalsak lo a ni.