PM Modi-a chennah in chungah drone thlawk hmuh a ni

Prime Minister Narendra Modi chenna in chungah nimin zing khan drone thlawk hmuh a ni tih Delhi police-te chuan an sawi.

Prime Minister chenna chung hi no-flying zone a nih avangin, drone thlawk hmuh a nih hian Special Protection Group (SPG) te chuan zing dar 5:30 vel khan Delhi police an hriattir nghal a ni. Police leh security te chuan engmah rinhlelhawm an hmuh loh thu an sawi a, Air Traffic Control (ATC) senior official pawhin engmah hlauhthawn tur awma a hriat loh thu a sawi bawk.

Delhi police chuan thuchhuah siamin,"NDD control room-ah PM chenna in chungah thil eng emaw thlawk a awm tih report kan dawng a. PM chenna chheh vel hi uluk takin kan dap a, mahse, engmah kan hmu lo. ATC pawh kan hrilh a, anni pawhin eng thil thlawk mah an hmu loh thu an sawi a ni," an ti.