Delhi Lt. Governor-in AAP sorkar rawih mi 400 a ban; AAP-in court-ah thlen an tum tih an sawi

Aam Aadmi Party (AAP) kaihhruai Delhi sorkar hnuaia department hrang hranga AAP-in hnathawk tura a rawih mi 400 te chu Delhi Lt. Governor, VK. Saxena chuan a ban. Hemi chungchangah hian AAP hruaitute chuan an lungawi loh thu leh court-a zualko an tum thu an sawi.

AAP hian thuchhuah siamin, hnathawk bante hi show cause notice pakhat mah pek an ni lo a, ban an nih chhan sawi fiahna pawh a awm chuang lo, Lt. Governor thiltih dan hi constitution kalh a nih avangin court-ah khin kan tum a ni an ti.

"Lt. Governor hian Delhi tihbuai vek hi a tum a, heng mi 400, thiamna nei ṭha leh nei sang tak takte hrem pawh hi Delhi sorkar thiltih a dona hmanrua mai a ni. Ban tura thutlukna a siam hian rorelna dik tih lam a ngaihtuah lo. Ban theihna turin thuneihna a nei lo bawk a, dan leh constitution kalha chein,a tum ber chu Delhi mipuite tihhrehawm a ni," tiin an thuchhuahah chuan an tarlang.

AAP chuan an mi rawihte chu zirna in ṭha ber ber, IIM Ahmedabad, Delhi School of Economics, NALSAR, JNU, NIT, London School of Economics, Cambridge, leh a dangte aṭanga zir chhuak an ni hlawm a, tha takin hna an thawk vek a, dan dik taka rawih an ni tiin a sawi.

Hetihlai hian Lt. Governor chuan heng mite rawih an nih hian Department of Personnel-in a phut, SC/ST/OBC reservation siam a ni lo, a ti. Service department pawhin sorkar rawih ṭhenkhatte hian an hnathawh lai atana educational qualification leh experience, hna lakna advertisement-in nei tura a phutte an neih loh thu an sawi ve bawk.