Eptu party meeting July 17-18-ah nei leh dawn

Eptu party-te chuan 2024 Lok Sabha inthlanpui neih tura thawhho dan tur ngaihtuahin, July 17-18 hian meeting an nei leh dawn.

Congress party General Secretary (Organisation) KC Venugopal chuan meeting tur hi a Twitter-ah sawiin, "Patna-a eptu party meeting hlawhtling tak kan neih hnuah July 17 leh 18, 2023 hian kokim zawkin eptu party meeting kan nei leh dawn," a ti. Ramin hma a sawn theihna atan leh, mi pakhat kaihhruaina hnuaia sorkar awm chu do turin theihtawp an chhuah dawn tih a sawi

Maharashtra-a National Congress Party (NCP) hruaitu chhuak an awm hnu lawka he thu an puang hian eptu party-te ṭanrualna a lantir dawn a ni, tiin Congress party chuan a sawi. Maharashtra-a Shiv Sena (UBT), NCP leh Congress thawhhona-Maha Vikas Aghadi (MVA) chu NCP hruaitu ṭhenkhat chhuah avang hian chhe taah an ngai a, mahse, eptute intel khawm chhan a tichiang leh zuala an ngaih thu an tarlang.

NCP President Sharad Pawar hi an party buaina chungchangah West Bengal Chief Minister Mamata Banerjee, Congress hruaitu, Mallikarjun Kharge bakah, Sonia Gandhi leh Rahul Gandhi te pawhin an lo be tawh a ni.

Congress General Secretary (Communication) Jairam Ramesh pawhin insukna hlo kawra Prime Minister Modi-a lem chuanna tweet-in,"Nimin khan Mumbai-ah BJP Washing Machine hman a ni a, a suk hloah hian ICE (Income tax, CBI, ED) te hman a ni. Eptute intel khawmna chu hlawhchham tura ngaiin thlahna thu an lo ziak der a, a ziaktu hi a la beidawng khawp ang. Mumbai-a an hmalakna hian eptute thawhhona a tiṭha sauh zawk a ni" tiin a tarlang.

Rajya Sabha-a Trinamool Congress hruaitu, Derek O'Brien pawhin "Maharashtra-a thil thleng hian kum 2024-a mi pakhat lalna hnuai aṭanga he ram chhanchhuak tura kan thawhho duhna a tinghet zawk ang," a ti ve bawk.