PM Modi-a'n a minister-te Vision 2047 a sawipui

Prime Minister Narendra Modi kaihhruaiin Thawhṭanni khan Council of Ministers meeting neih a ni.

Meeting hi Delhi-a Pragati Maiden hmuna Convention Centre-ah neih a ni a, PM chuan India-in zalenna a hmuh kum 100 a tlinna tur, 2047 pualin 'Vision 2047' chungchangte a sawipui.

Modi chuan 2047 thleng hi India tan Amrit Kaal - Golden era a nih thu a sawi a, India zalenna kum 100 tlinna atan hian kawng hrang hranga Minister-te chu inbuatsaih tur leh, infrastructure hmasawnna te ngaipawimawh zual turin a chah. PM Modi hian India thlen tawh chin chu chhuanawm a tih rualin khawvel ram dangte el pha tura hmabak an la ngah thute sawiin, tun thla kua chhung hian mipuite'n kum kua chhunga an hnathawh an hriat theih nan Minister-te chu an theihna zawng zawnga hma la turin a chah bawk.

Meeting hian darkar 4 leh a chanve chuang a awh a, kawng hrang hranga India hmasawnna tur awm theite thlirin presentation te pek a ni a, Minister thenkhatin an an hnathawh tawhte pho lanna presentation an pe bawk a ni. Budget siam tawh hman dan tur bakah, an policy tihhlawhtlinna tur atana hma an lak theih dante a sawiho a ni.