Tribal hnam tihdan zahsak chungin UCC kalpui a ni ang - Union Minister

Union minister of state for health, SP Singh Baghel chuan Nilaini khan Uniform Civil Code (UCC) chungchangah BJP chuan tribal hnamte a zah a, an sakhua leh hnam dan zahsak tak chunga kalpui a ni dawn tih a sawi.

Union Minister hian Rajya Sabha MP, standing committee on law and justice chairperson ni bawk, Sushil Kumar Modi-a'n UCC hian hmarchhak bial leh ram chhung hmun danga tribal hnamte huam ve lo tura a duh thu a sawi chungchang a chhannaah he thu hi a sawi a ni. UCC chu tribal hnam dan leh an sakhua zahsak chungin, an pawm tlan vek theih tur anga duan a ni ang tiin thuthar lakhawmtute a hrilh.

Prime Minister Narendra Modi-a'n kar liam taa UCC hman vat ṭul a tih thu a sawi hnuah, party leh pawl hrang hrangte chuan UCC chungchang hi an buaipui zui hle.

Thawhṭannia UCC chungchang ngaihtuah panel ṭhu khawm hmaah, Sushil Modi chuan tribal tamna hmun North-East leh Article 371-in an chanvo a humsak bik ang chite chu UCC hian huam lo se a duh thu a sawi a ni.

Baghel chuan, "BJP hian India President atan tribal hmeichhia kan vawrh a; MLA, MP, Rajya Sabha member leh Minister zingah pawh tribal mi nei tam ber kan ni. North-East-a hnamte tihdan leh nunphung hi kan zah a, sakhua leh hnam thilah chuan tu rilru mah tihnat kan duh lo, hemi rual hian intlawn lungawi tum zawnga politics khelh erawh BJP hian a tum lo," tiin a sawi.

Ram pum huapa dan inang hmanna tur, UCC hi BJP thil tum pawimawh zingah a tel a, hetih lai hian pawl tam takin an duh loh thu an sawi thung. NDA-a BJP thawhpui party leh NGO tam tak pawhin UCC an duh loh thu hi langsar takin an lo sawi tawh a ni.