Thil man sang chak avangin Congress-in Modi sorkar dem

All India Mahila Congress chuan an hruaitu, Netta D'Souza kaihhruainain ram chhunga thil man sang chak chungchangah BJP sorkar chu demin, nimin khan BJP headquarters kawtah nawrh an huaihawt.

Chawhmeh man sang chak lutuk chu Congress chuan duh loin, nitin mamawh mi retheite tana lei a hautak zel chu Prime Minister Narendra Modi thiam loh a ni tiin, mi retheite chhawmdawlna pe turin PM Modi hi an phut bawk.

Congress party thupuangtu, Supriya Shrinate chuan press conference-ah thu sawiin, mipuite chu thil man chungchanga kawng dik loa hruaitu Narendra Modi hi lal 'Mehengaai Man' a ni, a ti ."Sorkar hian mipuite hi a ngaihtuah tak tak em? Sorkar hian a theihna zawng zawngin mipuite phur chhawk tur hian hma a la em? Heng zawhnate chhanna chu 'aih' tih a ni. Rajasthan-a Congress sorkar chuan mipuite chhawmdawl tur hian hma a la a, chutianga ti ve tur chuan he sorkar pawh hi kan phut a ni. Tuialhthei mante tihniam tur hian sorkar hi kan beisei a, sorkar hian thil man reng reng hi tihniam rawh se, diesel leh thlai man pawh tihniam rawh se," tiin a sawi.

Shrinate hian press conference neihnaah hian tomato, purun var, sawhthing leh hmarcha hring te chu kg. 1 ṭheuh uluk taka tuamin a keng a, chungho man belh khawm chu Rs. 1,000 a tling tih sawiin, inneih thilpek atan pawh ṭha tak tur a ni, a ti.

Nawrh huaihawtnaa pung khawmte hi Delhi police-te chuan an khawm a, khawm leh hnawh darh an tawh laiin police-te hian kut an thlak niin an sawi. Hemi chungchangah hian Congress hruaitu, Jairam Ramesh chu ṭawng chhuakin,"Home Minister Amit Shah kaihhruaina hnuaiah Delhi police-te hian dan leh hrai bakah, tihdan phung zawng zawng bawhchhiat an hreh lo. Modi laka lungawi lohna lantirte chu an vau a, kut an thlak bawk. Hmeichhe pung khawm hnawt darh turin police mipa an tir bawk a ni," tiin a sawi.