Chhattisgarh police-te'n naupang 559 chhanchhuak

Chhattisgarh sorkar chuan June thla chhung khan naupang bo chhuia chhanchhuak turin Operation Muskaan a kalpui a, he operation hnuaiah hian Chhattisgarh police-te chuan an state chhung bakah, Uttar Pradesh, Madhya Pradesh, Telangana, Jammu and Kashmir, Maharashtra, Punjab, Rajasthan, Haryana, Delhi, leh Karnataka atangin naupang bo 559 zet an chhanchhuak.

Operation Muskaan hi Chhattisgarh police-te chuan CID inspector General, SC Dwivedi kaihhruaina hnuaiah an kalpui a ni. Thawhlehnia official-a thuchhuah an siamah chuan naupang chhanchhuah 559 zinga 72 chu mipa niin, 487 te chu hmeichhia an ni thung. Janjgir-Champa naupang 76, Raipur naupang 56, Bilaspur naupang 52, Sakti naupang 52 te chu chhanchhuah zingah hian an tel thu leh, naupangte chu an chhungte hnena dah vek an nih tawh thu an sawi.

"Chief Minister Bhupesh Baghel ruahmanna angin Operation Muskaan hi state chhungah kan kalpui a, Home Minister Tamradhwaj Sahu chuan Director General of Police, Ashok Juneja hnenah thu pein, chhanchhuah hna hlawhtling tak kan neih theih phah a ni. Police-te hlawhtlinna hian chhungkaw tam tak hlimna a thlen a ni," tiin thuchhuah an siamah chuan an tarlang.