UCC zir chiang tur Group of Ministers (GoM) panel din

Ram puma dan in ang khat hmanna tura duan, Uniform Civil Code (UCC) chungchang zir chiang turin sorkar laipui chuan Group of Ministers panel lailawk a din. GoM-ah hian Minister pali awmin, mawhphurna hrang ṭheuh pek an ni.

GoM panel-ah hian Kiren Rijiju chu hruaitu a ni ang a, ani hian UCC chungchanga tribal-te tana harsatna awm thei zir chian a kut ken ang. Women and Child Development Minister Smriti Irani chuan hmeichhiate dinhmun zir chianna tur a kalpui ang a; Culture, Tourism and Development of North-East region Minister G Kishan Reddy chuan hmarchhak bialin harsatna an neihte a zir chiang ang. Minister of State for Parliamentary Affairs Arjun Ram Meghwal chuan dan mit aṭanga UCC thlirna hrang hrangte a chang bawk ang.

Nilaini khan minister-te hi inhmu khawmin UCC nihphung leh hman a nihna tur kawnga harsatna awm theite an sawiho a, North-East state-a Chief Minister ṭhenkhatte kawm bawkin, hnam leh chi hrang hrangte'n dan hman bik an neih dante an zawt a ni.

GoM panel din hi sorkar laipuiin UCC chungchanga hma a lakna hmasa ber a ni. Kum 2019 khan Prime Minister Narendra Modi kaihhruai sorkar hian ram puma UCC hman chu election manifesto-ah a lo nei tawh a ni. Kar hmasa khan Madhya Pradesh-a thu a sawinaah, Modi chuan UCC hman vat a ṭul thu sawiin, ram inpumkhatna tihngheh nan leh khawtlang mipuite inngeih nan a ṭul tih a sawi.

Modi thusawi avang hian inhnialna a tam phah hle a, eptu party tam tak chuan duh loin, a thlawptu ṭhenkhat pawhin BJP kalpui tum dan ang chu an duh loh thu an sawi. Hmarchhak biala BJP thawhpuite ngei pawhin an hnam dan leh tihdante nuai bo a nih hlauin reservation hial sawi rikin a awm a ni. Sorkar laipui erawh chuan North-East chu UCC danin a huam lo ang tiin a sawi ve bawk.