Ram pawna IIT campus hmasa ber tur Tanzania-ah

Ministry of External Affairs (MEA) chuan Ningani khan India pawna Indian Institutes of Technology (IIT) campus hmasa ber tur chu Tanzania-a Zanzibar-ah din a ni dawn tih a puang.

Zanzibar-a IIT Madras Campus din tura inremna, memorandum of understanding (MoU) hi Nilaini khan ram pahnihte'n an ziak fel. India ram aiawh hian Zanzibar rama cham mek, External Affairs Minister, S. Jaishankar chuan hming ziakin, Zanzibar President Hussein Ali Mwinyi chuan hming a ziak ve bawk.

MEA chuan,"India ram pawna IIT campus hmasa ber tur hi Zanzibar-ah din a ni dawn a, IIT dinna tur hian India Education Ministry, IIT Madras leh Zanzibar Ministry of Education and vocational training te chuan MoU an sign a ni," tiin an tarlang. "IIT campus din hi hun rei tak chhung ram pahnihte inṭhianthatna lantirna leh, India-in Africa leh khawvel chhim lam ram mipuite nena inzawmna ṭha zawk a siam duh a ni tih lantirna a ni bawk. National Education Policy (NEP) 2020 pawhin India rama zirna in ṭhate chu ram danga din thei zel tura hmalak hi a tum a ni," a ti.