Sorkar laipui dan thar siam duh loin AAP-in kar 1 nawrh huaihawt dawn

Service posting chungchanga sorkar laipuiin Delhi tana dan thar a siam duh loin, Delhi-a sorkar lai, Aam Aadmi Party (AAP) chuan kar khat chhung kawng zawhin nawrh an huaihawt dawn tih an sawi.

Nilainia thuchhuah an siamah, AAP chuan dan thar siamna lehkha copy-te chu July 6 aṭanga July 13 thleng Delhi kawtthler hrang hranga kalpuia an hal tur thu an sawi a ni.

Chief Minister Arvind Kejriwal-a kaihhruai, AAP sorkar hian kumin May thlaa sorkar laipuiin Delhi sorkar hnuaia group-A officer-te transfer leh posting khawihtu tur thuneitu hran neihna dan a siam chu duh loin an lo auchhuahpui tawh. Supreme Court-in BJP sorkar dan siam ṭan zawnga thutlukna a siam bawk si avangin, dan thar chu thuneihna hman sual theihna tak tur a nih avangin a ngai anga kalpui leh phutin nawrh hi an huaihawt ta a ni.

Dan thar puan a nih tirh hian AAP chuan nawrh huaihawt an lo tum tawh a, mahse, Supreme Court-a an thlen tho avangin an lo ṭhulh tawh a ni. Mahse Supreme Court thutluknaa an lungawi zawh loh avangin nawrh hi an kalpui leh nia rin a ni.

Kejriwal hian dan thar siam dodalpui tur hian BJP ni lo party hrang hrangte thlawpna a ngen.