VP Venkaiah Naidu-in Covid-19 a kai

Vice President M Venkaiah Naidu chuan hripui leng mek Covid-19 a kai tih Thawhlehni zana a tweet-ah a tarlang a, symptom erawh a nei lo.

Kum 71 mi Vice President hian Thawhlehni zanah khan twitter kaltlangin Covid-19 a kai chungchang hi a tarlang a, kalphung pangngai anga routine test a neihna aṭangin hri a kai tih hi hriat chhuah a nih thu leh home quarantine-a a awm mek thu a tarlang a, natna a lang chhuak lo a, a hriselna pawh a ṭha tih a tarlang bawk.

A nupui Smt. Usha Naidu erawh chuan hri hi a kai ve lo thung a ni.

Rajya Sabha Chairman hi parliament monsoon session-ah pawh khan a tel a, parliament monsoon session kha member 25 laiin hri an kai tih hriat chhuah a nih hnuah tihtawi a ni nghe nghe bawk.